தமிழக சிவாலயங்களில் பிரசித்தி பெற்றது நெல்லையப்பர்- காந்திமதி அம்பாள் திருக்கோயில். பழைமை வாய்ந்த இக்கோயிலில் 518 – வது ஆனிப் பெருந்திருவிழா கடந்த 13-ம் தேதி கொடியேற்றத்துடன் தொடங்கியது.
திருவிழாவின் சிகர நிகழ்ச்சியான தேரோட்டம் கடந்த 21-ம் தேதி காலை 6 மணிக்குத் தொடங்கி இரவு 9 மணிவரை நடைபெற்றது. முதலில் விநாயகர், சுப்பிரமணியர் தேர் வடம் பிடித்து இழுக்கப்பட்டது.
அதைத் தொடர்ந்து சுவாமி, அம்பாள் தேரில் எழுந்தருளினர். நெல்லையப்பர் தேரை காலை 6.30 மணி முதல் 7.46 மணிக்குள் வடம் பிடித்து இழுக்கத் திட்டமிடப்பட்டிருந்தது. காலை 7.20 மணி அளவில் சுவாமி நெல்லையப்பர் தேரினை மாவட்ட ஆட்சியர் கார்த்திகேயன், நெல்லை மாநகர காவல் ஆணையாளர் மூர்த்தி, எம்.பி., ராபர்ட் புருஸ் உள்ளிட்டவர்கள் தேரை வடம் பிடித்து இழுத்தனர்.
நெற்றிப்பட்டம் கட்டி அலங்கரிக்கப்பட்ட காந்திமதி யானை முன்னே செல்ல, சிவ தொண்டர்களின் பஞ்ச வாத்தியங்கள் முழங்க தேரோட்டம் தொடங்கியது. ஆனால், 10 அடி தூரம் மட்டுமே தேர் சென்ற நிலையில் மீண்டும் 3-வது முறையாக வடம் அறுந்ததால் நிறுத்தப்பட்டது. இதனையடுத்து வடத்திற்குப் பதிலாக இரும்புச் சங்கிலி கோர்க்கப்பட்டுத் தேர் இழுக்கப்பட்டது.
